روضہ منورہ امام رضا(ع) میں کاشان کے2 ٹن  خالص عطر ِگلاب کا چھڑکاؤ

آستان نیوز کی رپورٹ کے مطابق؛ کاشان ریجن میں رضوی خدمت کے مراکز کے منیجر جناب محمد جہاندارنے تفصیلات بتاتے ہوئے کہا کہ رواں سال میں عشرہ کرامت کا نعرہ اور ماٹو’’امام رضا(ع) کا ایران؛متحد،مقتدراور کامیاب‘‘ہے ۔
انہوں نے کاشان ریجن کے خدمت گزاروں کی جانب سے  حرم حضرت فاطمہ معصومہ(س) اور حرم امام رضا(ع) کی دوٹن خالص عطر گلاب سے دھلائی اور چھڑکاؤ کا ذکر کرتے ہوئے کہا کہ پانچ سو بید مشک کا عرق بھی خریدا    گیا ہے جسے کاشان کے مخیر افراد کی طرف سے عطیہ کردہ  دوٹن گلاب کے ساتھ مشہد مقدس بھیجا جائے گا۔ 
انہوں نے عشرہ کرامت کے دوران منعقدہ متعدد پروگراموں بشمول امام خامنہ ای چوک پر رضوی پرچم کشائی کی تقریب،ماہ رمضان میں مسلط کردہ جنگ کے شہداء کو خراج عقیدت اورکاشان کے ہیلتھ مراکز میں رضوی خدمت گزاروں کی موجودگی اور دیگر کئی پروگراموں کے بارے میں تفصیلات بتائیں۔ 
اس کے علاوہ کھیلوں کے متعدد پروگراموں کا انعقاد،ضرورت مندوں میں دو ہزار کھانے کی تقسیم ،سٹی کونسل کے اراکین سے ملاقات،ماہ رمضان میں شہید ہونے والے شہداء کے مزارات کی صفائی اور گل پوشی وغیرہ بھی شامل ہے ۔
جناب جہاندار نے بتایا کہ شہر کے چوکوں و چراہوں اور اداروں میں امام رضا(ع) کی صلوات کا نشر کرنا،محلوں میں جشن کی محافل کا انعقاد،شہر بھر میں رضوی پروگراموں کا انعقاد،رضوی خدمت گزاروں کی جانب سے خون عطیہ کرنے کا پروگرام اور نذر شفا پروگرام کے تحت جہادی دستے پسماندہ علاقوں میں ہیلتھ سے متعلق خدمات فراہم کریں گے ۔
انہوں نے مزید بتایا کہ کاشان شہر کے خادمین عشرہ کرامت کے ایّام میں ’’معین الضعفاء‘‘ پروگرام کے تحت اہلبیت(ع) کی سیرت پر عمل پیرا ہوتے ہوئے ضرورت مندوں کے مسائل حل کریں گے اوریتیم خانوں ،فلاحی مراکزاوراولڈ ہومز میں جشن کی محافل منعقد کرنے کے ساتھ ساتھ جیلوں میں قید ماؤں کی رہائی بھی کروائیں گے۔
آخر میں ان کا کہنا تھا کہ گذشتہ سال کے دوران  پانچ ہزار پانچ سو انتیس  عوامی خدمات اور944 خصوصی خدمات کاشان میں فراہم کی گئیں اس کے علاوہ گذشتہ سال 182 رضوی خادمین کو جذب کرنے کے ساتھ181 خادمین کو اعزازی خادم کا درجہ دیا گیا۔
واضح رہے کہ کاشان کے خدماتی مراکز کے خادمین کا نیٹ ورک 669 خادمین پر مشتمل ہے جن میں 462 مرد اور207خواتین اور 408 یاور رضوی خادمین ہیں۔